|
تدخل رهان على مين يشيل
يشيل همومه و يمشى بيها طريق طويل
و تتنقل من جيل لجيل
يضحك فى يومه كأنه عمره ما كان زليل
و لا كَـل قليل
* * * * *
تدخل رهان على مين يسوق
فى ضلمة كحلة . . فى وسط سوق
و الحالة جيم من سوء لسوء
و ف قلبة حاجة بتقول له حاجة
يا واد مسيرها تحلى و تروق
* * * * *
تدخل رهان على مين يعوم
من غير هدوم
لبر متغطى بغيوم
فى بحر هايج طوب و شوم
و لما تتعب رعشته
تونِسه بِـعَـد النجوم
* * * * *
تدخل رهان على نجم غيَّر دورته
عشان فى وسط الكون يبان
على غول و نمله جَـرِّتُـه
لسجن بين أربع حيطان
على شعب أجِّـل ثورته
لما يعدى المزلقان
تدخل رهان ؟
حسن العربى
|
