لما الواد يعلنها صريحة * * من على بُعد تِشِّمى الريحة
ولا مشية ولا قاعدة مريحة * * و يعيَّيط و يزِّن كتير
يبقى ما جاش وقت التغيير
 
لما يقوم و ينام بصريخ * * و نشوف بين رجليه تسليخ
و يسخنوا فى ودانه السيخ * * و يعض بغيظ ع الضراضير
يبقى ما جاش وقت التغيير
 
لما جيران و صحاب يتلمو * * مهما ان شافوا مهما ان شموا
إشتمى خاله و أطردى عمه * * دى شئون داخلية و تدابير
حشرية و مالهاش تبرير
لسة ما جاش وقت التغيير
 
لما يعيش و يعوم فى قمامة * * و يبدلوا لقمته بلمامة
و الببرونة بالكمامة * * و مسدس فِـلَّـة بطراطير
قبل ما يبدأ فى التفكير
يبقى ما جاش وقت التغيير
 
و يشوف غيرة ماهوش سقعان * * متحمى و نايم شبعان
و بتحرصة شلة جدعان * * رايحين جايين بالدبابير
بِلا تقصير  

لما يكون مصروفه قُـليِّيل * * و نقول إيه طلباته دا عَيِّيل ؟
يطلب حاجة نقول له اتنَيِّل * *لازم تنشأ ع التوفير
بَلا تبذير
يبقى ما جاش وقت التغيير

مصروف له فى السنة حفاضة * * و فالنة كستور فضفاضة
و بيعمل شبشب عضاضة * * و بيرسم عالحيط عصافير
نفسه يطير
 
حركاته و ألفاظه أبيحة * * من غير هندام ولا تسريحة
شكله ف وسط إخواته فضيحة * * كونه البكرى و إبن كبير
لسة بيلجأ للتزوير
 
لما حايكبر حايعَرَّفـكو * * زى ما قرَّفـتـوه يقَـرَّفـكو
لا حا ينصفكو و لا يشرفكو * * حايكسَّر كل الزمامير
و يغييَّر أنضف تغيير

حسن العربى       

القصيدة التالية  • القصيدة السابقة