أنا ثور فَرعون . . هايج مجنون
جرحونى و عصروا علىَّ لَمون
فكونى و رشوا فى عينى صابون
وانا ثور متغمى بقالى قرون . .  و طلع لى قرون
مربوط فى طاحونة وانا المطحون
لانا قادر أطبق فيها قانون
ولا قادر أطاطى واعيش مدفون
مانا ثور فَرعون
* * * * *
ملعون . .
 ملعون الزمن إللى عَمَانى و بقيت مغمور
و تغور العيشة إللى تخلى المالك مجبور , و التاج طرطور
صراصير الأرض بتـتــنطـط على ظهر نمور
و تغور العيشة إللى تخلى المارد مذعـور . . واعى و مخمور
و زباين إبليس بالجزمة واقفين فى الزور
يتلم المحصول و أتعاير بالأرض البور
أنا ثور مقهور . . نط من السور آم لفحه النور
ماعرفشى الكحك من البيتى فور
ماعرفشى العُـرف من الدُستور
* * * * *
على طول معذور . . حمَّـال و صبور
أغفر و انا عارف بالمستور
و ألزَّق فى البيض المكسور
و ألِّم الدور . . و ف لحظة أثور
الاقينى لسان و بيان و ساطور
ولا ميت ميتادور (مصارع الثيران باللغةالاسبانية)
يقدر يصارعنى و أنا المنصور
مِن إمتى الحق يصارعه الزور ؟
أنا ثور مغرور
* * * * *
أنا ثور معلوف
بضمير و ثقافة , أدب و قطوف
حَطوا لى عليقِـت كدب و خوف
حكمونى و هُمَّا علىَّ ضيوف
غَمُّونى و قالوا سلامة الشوف
غَمُّونى بكدب و زيف مكشوف
لا حيا و لا كسوف
بصيت فى مرايتى لاقيت حلُّوف
لانا عارف مُنكر من معروف
ولا عارف خرطوش من مولوتوف
بايت زهقان صابح مأروف
بوعود و قرار و كلام ملفوف
و كأن الطبخة الجاية خروف
الدعوة تروح  لحيتان و جلوف
فين التنتوف ؟
إسمك محذوف
و حروف بتنط و تمحى حروف
أنا ثور مخسوف . . .

▼