السُلطة و إتجوزت المــــــال * * ولا حد خاف لا الكيل يطفـــح
و بالشفا و مش عايزة جِدال * * حايجَرَّبوا فينــــــــا الأنـقــــح
أصل الوزير رجل الاعـمـــال * * محتاج صوتين علشان ينجح
 
خِصم و حكم , بيشوط و يصُـد * * من غير خجل يسأل و يرد
و معاه قلم إن كــــــــان ولا بد * * رصاص بإستيكة بتمســح
 
الصبح يستجـــــوِب نـفـــــسـه * * و ينقى قوانين على نِـفـسه
ولا حد طابق عـــــلى نَـفَـسُـــه * * ولا صوت ولا عين بتبَجَّـح
 
و الضُهر يفقد و يخصـخـص * * و أراضى بالميل تتخـصــص
وإن فاض لنا عجل معصعص * * يتـمصمص الديل ف المدبح
 
و العصر يرجع لسيجـارُهُ * * و يشب للســـما مُنخـارُه
بالليل مبـادئـه بـيـنـــهارو * * و الصُبـح ترجع تتصَّلَّح
 
يا ناس دا حايجيب وقت إزاي * * و مين حايسمع منَّا الجَاي
و هوَّ بعد ال "هاى" باى باى * * و قبل ما بـيــجي يِــــرَّوُّح
 
أكيد وراه شِلة أقـــــزام * * ما بيقولوش غير كُـلُّه تمام
هوَّ إللى زيُّه إزاى بينام * * و إللى ف رقبته بيتشـــرَّح
 
ماهوش عشان دخل إضافى * * أو جوز أرانب خـَـفَّـافــى
ما فاضلشى غير لحم كتافى * * دول صحتين وإياك يربح
 
لازمتها إيه المِــــدادِيَّــــة * * أصل الرعية , النـــاس دِيَّـة
غلابة , لأ, مالهاش دِيَّـــة * * م الجوع ماتقدرشى تِـفَـتَّـح
 
إعمل لى فيهم ما بدالك * * مادمت من وَسَـع إدالــــــك
مايعرفوش حد بِدالــــك * * و الداهية لا تكون الأصلح
 

لخدمتك بتجنـــــدهم * * و بكلمتك بتـسَّـجِــــدهم
و آخر اليوم تجلدهم * * و الأعمى بيجُر مكسح
 
عشان يروح يدِّيـك صوته * * و يمضي و يأجل موتـــه
أصل الوزير الكوتو موتو * * دبح له عجلين و إتبحبح
 
يكونشى من قلة ألقــــــــاب * * و يبقى باشا معالى جناب
ما تفتحوش , لأ فُكُّوا الباب * * سعادته هالل عالمـطــرح
 
الرزق يهوى الخِـفِّـيــــة * * و القُبة حسنة و مخـفـيـة
تِـنساش تِـفُـك الحنـفـــية * * خَللي إللي بعدك يتســوَّح
 
و تقول سيبوه ينشف زيته * * و مايلاقـيـش إللى يـغـيـتـه
و م العرق يخــــرب بـيـتـه * * كأنه كان زيـــــر بـيـرشــح
 
و ف كل دَورة إنت الشغـال * * ملموم عليك شُبــان و عـيــال
ياما عليـك تــــورد أجيـــال * * و إنت إللى مانتاش متزحـزح
 
و ف الدعـايـا إكتــب بقَّــــال * * سباك و ترزى حريم و رجـال
نائب - وزير- و رجل أعمال * * يستجرى واحد يتـــرشـــــــح؟

حسن العربى       

القصيدة التالية  • القصيدة السابقة