العالم الأول ؟ هاء أو
ديموقراطية ف بحر و جو
حرية لكلاب تنهشنا
و فى القفص فرخ يصَو صَو
. . . . . .
خايفين على بنوكهم تفضى
و مش مهم شعوب ترضى
دا أكل عيشهم فى الفوضى
و رزقهم فى الخوف م العو
. . . . . .
يتلموا عالريِّس منهم
و يحلبوه و يأمنهم
من دم شعبه يسمنهم
على أد ما يحوِّل يحلو
. . . . . .
العالم الأول ؟ هاء أو
. . . . . .
يبيع سلاح ياخد بترول
صديق حميم و كلام معسول
و لما يُـقَـع العجل يقول
أنا كنت ضد نظامه السو
. . . . . .
دول صدعونا حقوق إنسان
دول نصابين لابسين فرسان
حِصار و فيتو و قص لسان
أو عزل أو عقوبات أو أو
. . . . . .
بنـسـتـلف من أموالنا
و بالـربا نربى عيالنا
و يكَرَّهونا ف أحوالنا
تعلالى يابا . . أبوك ؟ جاك بَّو

ينضفوا قدام بيتهم
و يحَـدِّفونا بزالتهم
و إللى يهوِّب ناحيتهم
يا يبتسم يا يقول هَو هَو
. . . . . .
العالم الأول ؟ هاء أو
. . . . . .
للقرصنة أشكال أكتر
مش بس عين عورة و خنجر
دا بالقانون . . جوَّع . . هجَّر
قرر و دمرهم فى التو
. . . . . .
آدى نهاية تلبيخهم
فى ميت سنة . . إقروا تاريخهم
حكام طغاة من تفريخهم
و إشى إحتلال و مهانة و لهو
. . . . . .
خلينى من عالم رابع
سابع . . و مش حابَّة تواضع
ماكونشى من لبنك راضع
حايجى يوم ندمان راكع
يبوس إيدَيَّـا . . وأقول له . . و لو
. . . . . .
العالم الأول ؟ هاء أو

حسن العربى       

القصيدة التالية  • القصيدة السابقة