أنا كــوول وباحـب الحـــرية * * معــجـب بـآرائـى الثـوريـة
و كلامى كلام كله إسـتلاحات * * تُـرُوحات حاتـفيــد البـشـرية
أعرف بلغات بعض الأباحات * * بتخـللى لنا الـقـاعـــدة طـرية
و باروح مازادات و أشترى لوحات * * و كتب و مراجع أثرية
 
و الحاجَّـة ساعات تعمل مناحات * * مش أمى ؟ لكـنـها فـقـرية
مالهاش فى اللِّت ولا الفسحات ** أصلها مش دايـمـا حـشـريـة
و تقوللى يا واد بطل شطحات * * طريقتها ماهياش حـضـاريـة
يابنى المعاشات مافيهاش نفحات * * ولا قرش يزيد عالشهرية
 
كانت معقولة و مقبولة * * فى شبابها بريئة و فطرية
إنسانة خجولة و مقفولة * * ولا روج ولا إيـد متعـرية
و بتطلع عالدفعة الأولى * * و يبصوا عليها بـسخـرية
مش دى الإنسانة العصرية
 
تعـجـبنـى البنت الفاهـمة الناعمة * * دمـاغ و ملامـح مغـرية
ترقـص فى اللَّـمة , أمـاكن عـامة * * و بتحضر ندوات شعرية
و صريحة و مالهاش فى الضلمة * * و لا فى الأفعال المذرية
 

تـخرج و تغيـب و بتـلـبـس جيـب * * أو جينس و كيرلى وغجريـة  
مش حابة رقيب , دا حرام و دا عيب * * دا غريب مفهوم العذرية !
و تشوط و تعـيـب فى غريب و قريـب * * تعـجبنـى القـطـة البرية
 
و بكلمة تـدوب و بصـوت مغلـوب * * من بعد ما كانت نِـفَـريـة
تهديك دبدوب , و شموع و قـلوب * * و تجمَّع ف ذئاب بشرية
و العربى يادوب بلسان مقلوب * * ماراحتشى مدارس أمـيـرية
 
و نكون أنتيم و بنـعـمـل تيم * * نـتـبـادل حـوارات فـكـريـــة
و بقصد سليم , حبة تـعـتـيـم * * نـبـدأ فـى أمـور المِـداريــة
من غير تقطيم , مانا أصلى يتيم * * محتاج لشوية شاعرية

الصـبح رزاز , غمـز و ألـغــاز * * و تـقـول يـا جـواز عـالـظـهـريــة
أو عرفى إن جاز , و دى لمبة جاز * * و حاعيش لك خدامة وجارية

الله يخـلـيـك , لا فـَرَح ولا كـيــك * * دى مسائل فى نظرنا صـورية
و لا حالبس شيك , و بلاه البانكيك * * و حاكونلك م الجـنة حورية
و انا أقول يا فكيك أصلها تـلاكـيـك * * كـان هـنـا فـيه دراجة نارية
بِدينى لاوارييك يا وضيع يا ركيك * * دا انا ياض من باب الشعرية

أرجع للنسخة المنقولة * * و أسأل عالوصفة السحرية
إنسانة خجولـة و مقـفولة * * ولا روج ولا إيد متعـرية
و بتطلع عالـدفـعـة الأولى * * و يبصوا عليها بسخرية
و دى ست البيت العشرية
 
تشبه لها وإنقسمت فولة * * بتصَّحى البيت م الفجرية
دايما مشغولة و مسئولة * * بإيدين و صوابع مهريـة
وانا كُللى تسلط و رجولة * * و عليها الطاعة الجبريــة
 
راح فين بسلامته مرتبها * * مش فاتحـو مؤسـسـة خـيـريـة
إن عَـلِّـت صـوتـهـا نأدبـهـا * * محسـوبـك صـاحب نـظريـــة
و إن حكمت بالشرع أضربها * * و دى أحلى الطرق القهرية
 
و أخـش البـيـت جاهـم وغـتـيـت * * و أخرج بزوابع مدارية
من بعـد غـزالة أشـوف خـرتـيـت * * وطـالـع لـه قـنابل ذريـة
أسمع فى صويت و أشم ف زيـت * * و قَـليـِّة و أكلات بحريـة

 
من بعد ما دُبْت و حبيتها * * نبرة صوتها ألآت وترية
أطفش من ريحة جلابــيـتـها * * قادر يرزقنى بسفرية
ودا غير بس بنات خـلـفـتـها * * و أنا عايز أمد الذرية
واللا آخد قرارات مصيرية ؟

و أرجع و أدوَّر فى الكافيهات * * أو فـى الـنـدوات الـشعـريــة
عـن بـنـت بـتـبـحـث فى الـتفـاهـات * * بشعور و ملامح مغرية
و صريحة و مالهاش فى المتاهات * * و لا فى الأفعال المذرية
 
أنـدم و حـكايتـى تزيد تعقيد * * و حنـيـن لحياتى الأسرية
أتحيَّر فيها و أعيد و أزيـــد * * و أسترجع لحظات قدرية
 
لـو حأحلـم من أول و جديد * * حانسى الهتافات الثورية
وأحـلم لـولادى بفكر يـفيـد * * غير مجتمعاتنا الذكورية
إللـى بتسـترجل بالـتشـديـد * * وأحـلم لـبـنـاتـى بـحـريـة
أصلية أكيد من غير تقـليـد * * و تليق عالروح المصرية

حسن العربى       

القصيدة التالية  • القصيدة السابقة