كان فيه أمل عندى . . إن الربيع حايدوم
صحيت لاقيت وردى . . بيجف يوم عن يوم

و جناينى قال: "عندك" . . أنا حارعى بستانك
ده شأنى موش شأنك . . خليك فى دُكَّانك
إصرف على أهلك . . بيع و إشترى كيانك
يومين و حاندهلك . . إدينى عنوانك

شهرين بقوا ستة . . بالضغط و السكتة
و الشيلة و النَكتة . .
مليون بيان . . طرطق ودان . . قطَّع لسان
ساب الفيران ترعى و بقت فَـتَّــة

شهرين بقوا تسعة . . نار الميدان خِسعة
لا قرصة و لا لسعة . .
فض الميدان . . كسَّر عيدان . . خَوِّن . . أدان
نشر الديدان . . بِسُلطته الواسعة

وردى إللى مات إتنسى . . أما السليم إنداس
نهارى ليلى ف أسى . . مابين عزا و قُدَّاس

ليه الزهور تتلم . . و العُشب ليه يتساب
و الليلة قلبت غم . . إيه تُهـمِـتك يا شباب

ياعم يا خطاط . . غيرت لى الأسماء
الترزى بقى خياط . . و الداء بقى الشيخ داء

يا عم يا راعى سجل هنا الطلبات :

إكتب على إزازة مبيد "شربات"
و النقض سميه "قذف و مسبات"
خللى الولد ينخرص فى الحبس لما يبات
دى الفولة لو لَـسَـنَـت تكبر و تبقى نبات

دم الشهيد دا وللا كان صبغة
وللا شهادة العيان ناقصة ورق دمغة
إكتب على ضهر الحمار نابغة

إكتب على الأقزام "هامات"
إكتب على حقى "هِـبات"

سيب العفونة زى ماهى . . و غيَّر اللافتات
و رُش بويه عالوطن و إكتب "شتات"

إكتب على جنينتى "مقابر شرذمات"
و دُق شاهد رُخام , و إكتب "هنا يرقد سُخام"
و اطلب لنا الرحمة و قول كلمات
دى الرحمة جايزة عاللى عايش و إللى مات
على شعب فرقع م السُكات
على شعب ظأطط بالفُتات
و انا كل دول
أنا ناس بتضحك فى الكوارث و النوبات
أنا الأسى و الأمنيات . . أنا العزا و الأمسيات

لابِـد فى روحى و النَـفَـس مكتوم
ما عِـدمتش الحيلة و أنا المرحوم

حانسج وليدى من الرُفات . . حايقوم
يِنَـفَّـض العصر إللى فات . . يا هموم

همِّى جناينى عض نفس البز
و همِّى يرجع لى الوقار و العز
خد يابنى إيدى . .أنتفض و أفِّـز
يدق قلبك . . أنطرب و أهز
صوتك بياتى و خطوتك مقسوم
إلفحنى على كتفك و عوم
لبر آمن فيه ربيع بيدوم

حسن العربى         
 

القصيدة التالية  • القصيدة السابقة