|
مصراوى تايه بفنى
أواسى ولَّلا أهنى
أعَّـزى ف شهيد بلادى
ولَّلا بنصره أغنى
إستخسروا الحلم فينا
و فيها منها اتنفينا
على المشايخ حِفينا
و آخرنا كان التمنى
بكينا لما استوينا
هوينا فيكى و نوينا
لو حتى يوم إتشوينا
عارفين مسيرك تحنِّى
مصراوى زينة الشباب
عنوانه على كل باب
و فولُهُ أطعم كباب
عفريت مشاغب و جِنِّـى
من بعد نكته و هزار
شافوا ف عينيه الشرار
فرض عليهم قرار
مين إللى يقدر يتَّـنى
مصراوى حقك إمامك
أُحكم فى إيدك لجامك
تِـنـفَـك ربطة حزامك
و كل شئ بالتأنى
ماهيش مغارة و كنوز
أو زير و نغرف بكوز
يا إما تضربها بوز
و تعتصم غصب عنى
صبرك زمان كان تياسة
دلوقتى حكمة و كياسة
و الإقتصاد و السياسة
حدين مَقًّـصى و مَـسَّـنى
حاتنتهى كل حوجة
و تتعدل كل عوجة
و الثورة مش أى موجة
يركبها و يقول سبقنى
لا هىَّ ناقصة زعامة
ولا فخامة و وسامة
ولا خطابة بأيامة
ولا وصاية و تبنى
مصراوى حاعرف طريقى
من بعد ما بلعت ريقى
و نزعت من صدرى ضيقى
و عزلت إللى أهاننى
خلينا نحسن ظنوننا
لكن نفتَّح عيوننا
و نعيد خِصالنا و فنوننا
و نقوم نصلَّح و نبنى
حسن العربى
|
