|
تَكةِ الواد عالزرار
إللى خللا الليل نهار
ولَّلا من حِتِة "ماوس"
داس على دقون الكبار
خلت العقل إللى حارب
بالجمل أو بالحمار
مش مصدق إنه شعـلل
من غباوتهم شرار
"الريسايكل بن" حاتزهق
من روابط ليعتذار
من مِحاور أو مفاوض
لسة سايق ف الهزار
إمسحوا بِل "أنتى فيروس"
إسطوانات الحوار
فرمتوا "بالسوفت وير"
صوت ضميرنا المستعار
إحفظوا ملف الكرامة
يا شباب و الإعتبار
كلمة السر العدالة
نبتدى بحذف الزبالة
و الخيانة و الندالة
و نمحى صفحة لإنتحار
الرموز و الأيقونات
عايزه ترحل من سوكات
قبل ما تكتب شيكات
بالأراضى و العقار
الشباب منهم مِقَـلَـق
م الفساد "الديسك" فَـلَّـق
وِ لوعودهم مش مصدق
أصله مش أول قرار
لما حاول يقتلِك
الفارات قالت كليك
يابلدنا بنمتلك
صوت ولا أعلى انفجار
أصلهم "سيستم" قديم
فيه رعايا و فيه زعيم
حال وجوده بنستقيم
وف غيابة الإنهيار
راح نِخَلِّيه إفتراضى
و النهارده فعل ماضى
لما ناوى عالتراضى
ليه بيبدأ بالدمار
وإللى "هَـنِّج" كان جهاز
أمن سطوة و إبتزاز
بالرصاص مطاط و غاز
كان بياخد أى تار ؟
و الشباب لو هَدِدوه
مهما حاولوا يفسدوه
هىَّ ضغطة عل "ري دو"
ترجعى مصر العمار
و الضمير فيكى يراعوه
و الفساد حايودعوه
و النظام حايصدعوه
يجرى و يبلغ فرار
و الوطن حايرجعوه
م "الهاكرز" إللى باعوه
و الوليد حايرضعوه
صدق و شهامة و وقار
حسن العربى
|
